Сябры, мы працягваем расказваць пра новыя перамогі HVILINA!
Наша калекцыя UNIVERSUM MECHANICAL атрымала ўзнагароду міжнароднай прэміі iF DESIGN AWARD 2024 у катэгорыі “Product - Watches/Jewelry”. Прэмія ўручаецца найстарэйшым у свеце незалежным інстытутам дызайну iF International Forum Design GmbH (Гановер, Германія), і з'яўляецца адной з найважнейшых дызайнерскіх прэмій у галіны.
Калекцыя гадзіннiкаў UNIVERSUM MECHANICAL, натхнёная рамантызмам космасу, прысвечана ўпартасці і неверагоднай вынаходлівасці чалавека ў пошуках ісціны. Дызайн пабудаваны на канцэпцыі зліцця стылізацый двух зорных карт — старажытнай і сучаснай, што падкрэслівае дасягненні чалавека ў разуменні прылады Сусвету. Цыферблат абсталяваны двума кольцамі для індыкацыі часу (вонкавым і ўнутраным), а таксама календаром.
У гэтым годзе ў журы iF DESIGN AWARD увайшлі 132 незалежных эксперта ў галіне дызайну, якім трэба было ацаніць каля 11 000 прац з 72 краін. Крытэрыі для ацэнкі ўключалі ідэю, форму, функцыянальнасць, інавацыі і карысць грамадству.
Мы ўдзячныя за нязменную падтрымку і веру ў нашу місію. Дзякуй, што вы з намі!
* iF DESIGN AWARD — адна з самых важных дызайнерскіх прэмій у свеце, заснаваная ў 1954 годзе Міжнародным дызайнерскім форумам у Гановеры. Прэмія штогод збірае дзясяткі тысяч заявак і ўзнагароджвае працы з абласцей прамысловага і камунікацыйнага дызайну, дызайну пакавання, інтэр'еру і архітэктуры. Усе лаўрэаты конкурсу прадстаўлены ў каталогу iF Design Winners 2024.
Азнаёміцца з конкурснай працай можна па спасылцы: https://ifdesign.com/en/winner-ranking/project/universum-mechanical-watch/620684
